« Nostre amé et féal, ayant nostre sainct père le pape Grégoire le treiziesme ordonné un calendrier ecclésiastique, lequel sa saincteté nous a envoyé, comme à tous les autres roys, princes et potentats de la chrestienté, par lequel elle à trouvé estre nécessaire de retrancher dix jours entiers en la présente ,année, pour les causes et raisons amplement déduites par iceluy.

Et combien qu'elle ait ordonné que ledit retranchement seroit dedans le mois d'octobre dernier passé, néantmoins n'aurions peu le faire exécuter et ensuivre audit mois. Et voulans que les sainctes ordonnances du sainct siége ayent cours, et soient observées en nostre royaume, comme il convient, mesme en ce fait, pour ne nous des-unir et séparer des autres princes qui ont jà receu et fait observer ledit calendrier : nous voulons et ordonnons qu'estant le 9^ème jour du mois de décembre expiré, le lendemain que l'on compterait le 10 soit tenu et nombré par tous les endroits de nostre royaume, le 20^ème jour dudit mois, le lendemain 21^ème auquel se célébrera la feste sainct Thomas. Le jour d'après sera le 22^ème, le lendemain 23^ème, et le jour ensuivant 24^ème. De sorte que le jour d'après, qui autrement et selon le premier calendrier eust esté le 15^ème, soit compté le 25^ème, et en iceluy célébrée et solemnisée la feste de Noel. Et que l'année présente finisse six jours après ladite feste, et la prochaine, que l'on comptera 1383, commence le 7^ème jour après la célébration d'icelle feste de Noel. Laquelle année et autres subséquentes auront après leur cours entier et complet comme devant.

De laquelle nostre intention et ordonnance avons bien voulu vous advertir, afin qu'ayez à l'ensuivre, faire observer, et pourvoir au service qui se doit faire aux advents de ladite, feste de Noel, et à autres festes ordonnées par l'église esdits jours retranchez.

Et la faire proclamer et lire aux prosnes des églises de vostre diocèse, comme nous enjoignons présentement à nos cours de parlement, baillifs et séneschaux, faire en l'estenduë de leur ressort et jurisdiction, afin que nul n'en puisse prétendre cause d'ignorance. Et à ce ne faites faute, car tel est nostre plaisir.

Paris le 2 et 3 novembre 1582, publiée à son de trompe par les carrefours de Paris, le 10. »